白话广州
前嗰排，媒体搞咗个“文明餐桌”论坛，请班街坊一齐倾下点样文明用餐。好多人认为，文明用餐要做到唔剩餸唔剩饭唔食烟唔劝酒。其实，喺广州，除咗上边呢啲“注意事项”，仲有好多本地特色嘅礼仪。
广州人嘅“餐台礼仪”同本地风俗有关系。譬如出去开饭点菜，绝对唔可以点七个餸。因为广州人认为咁样叫做“食七”，只有办白事先会咁做。又譬如食鱼，食完正面千祈唔好将鱼反过嚟食，因为广州人将鱼睇成车、船、屋，如果在座有人行船或者开车，“反转鱼身”相当于“诅咒”。再譬如食饭时唔可以将筷子插喺饭里边，因为形如“装香”。
广州人认为，一个人嘅“餐台礼仪”可以反映佢嘅家教，所以父母长辈平时都会教好啲细路仔，免得出去食饭“丢架”。记得细个嗰时夹餸，睇见边样好食就夹边样。呢个时候阿妈都会一筷子架开，讲句“飞象过河”，然后再话：“夹自己前面嗰啲，对筷子唔好飞到人哋面前。”食饭前贪好玩用筷子敲碗都系“禁忌”，因为大人话只有“乞食”先会敲兜；食完饭亦都唔可以讲“好饱”“饱死”之类嘅说话，因为“呻饥莫呻饱”，成日“呻”以后就食唔饱喇。
呢啲“餐台礼仪”，我谂好多外地朋友未必完全知晓，所谓入乡随俗，系时候学一学喇。◎李月婷媒体人
